Xəbərlər

ADMİU-nun Həmkarlar İttifaqı Komitəsinin təşkilatçılığı ilə əməkdaşlar üçün Şamaxı rayonuna birgünlük ekskursiya təşkil olunub

11 İyul 2026-cı il tarixində ADMİU-nun Həmkarlar İttifaqı Komitəsinin təşkilatçılığı ilə universitetin əməkdaşları üçün Şamaxı rayonuna birgünlük ekskursiya təşkil olunub.

Ekskursiyanın məqsədi əməkdaşların asudə vaxtlarının səmərəli təşkili, istirahətlərinin təmin edilməsi və kollektiv daxilində ünsiyyətin daha da möhkəmləndirilməsi olub. Səfər zamanı əməkdaşlar Şamaxı rayonunun zəngin təbiəti və görməli məkanları ilə tanış olub, xoş istirahət edərək yaddaqalan anlar yaşayıblar.

Azərbaycan Dövlət Mədəniyyət və İncəsənət Universitetinin Həmkarlar İttifaqı Komitəsi tərəfindən mütəmadi olaraq həyata keçirilən bu kimi sosial-mədəni tədbirlər əməkdaşların sosial rifahının yüksəldilməsinə, sağlam psixoloji iş mühitinin formalaşdırılmasına, kollektiv ruhunun möhkəmləndirilməsinə və əmək fəaliyyətinə motivasiyanın artırılmasına mühüm töhfə verir.

ADMİU - nun Həmkarlar İttifaqı Komitəsinin təşkilatçılığı ilə əməkdaşlar üçün Ekskursiya

ADMİU - nun Həmkarlar İttifaqı Komitəsinin təşkilatçılığı ilə universitetin təsərrüfat şöbəsinin əməkdaşlarının asudə vaxtlarının səmərəli təşkili məqsədilə Quba rayonuna 1 günlük ekskursiya təşkil olunub.

ADMİU-nun professoru Vamiq Məmmədəliyevin 80 illik yubileyi qeyd olunub

Beynəlxalq Muğam Mərkəzində Azərbaycan Respublikasının Xalq artisti, tanınmış tarzən, Azərbaycan Dövlət Mədəniyyət və İncəsənət Universitetinin professoru Vamiq Məmmədəliyevin 80 illik yubileyinə həsr olunmuş tədbir keçirilib.

Tədbirdə dövlət və mədəniyyət xadimləri, elm və incəsənət nümayəndələri, musiqiçilər, ziyalılar və sənətsevərlər iştirak ediblər.

Yubiley gecəsində çıxış edənlər Vamiq Məmmədəliyevin Azərbaycan musiqi mədəniyyətinin inkişafında, milli ifaçılıq ənənələrinin qorunub saxlanılmasında və gənc musiqiçilərin yetişdirilməsində mühüm xidmətlərindən bəhs ediblər. Bildirilib ki, görkəmli tarzən ömrünün böyük hissəsini Azərbaycan muğam sənətinin təbliği və inkişafına həsr edib, zəngin yaradıcılığı ilə milli musiqi tariximizdə özünəməxsus yer tutub.

Qeyd olunub ki, Vamiq Məmmədəliyev uzun illər ərzində həm ifaçı, həm də pedaqoq kimi səmərəli fəaliyyət göstərərək Azərbaycan tar məktəbinin inkişafına mühüm töhfələr verib. Onun yetişdirdiyi çoxsaylı tələbələr bu gün ölkəmizin musiqi həyatında uğurla fəaliyyət göstərərək milli ifaçılıq ənənələrinin davam etdirilməsinə xidmət edirlər.

Tədbirdə Azərbaycan Dövlət Mədəniyyət və İncəsənət Universitetinin rektoru Ceyran Mahmudova da çıxış edərək yubilyarı təbrik edib, ona möhkəm cansağlığı, uzun ömür və yeni yaradıcılıq nailiyyətləri arzulayıb.

Çıxışlarda vurğulanıb ki, Vamiq Məmmədəliyev tar alətinin zəngin ifadə imkanlarını yüksək peşəkarlıqla nümayiş etdirərək Azərbaycan muğam sənətinin ölkəmizdə və beynəlxalq səviyyədə tanıdılmasına mühüm töhfələr verib. Onun Qızıl Fondda qorunan ifaları və görkəmli xanəndələrlə yaratdığı sənət nümunələri milli musiqi irsimizin dəyərli incilərindəndir.

Tədbirin bədii hissəsində tanınmış xanəndə və tarzənlər tərəfindən muğam və xalq mahnılarından ibarət konsert proqramı təqdim olunub. İfaçıları Əməkdar artist Əliağa Sədiyevin rəhbərliyi ilə “Xarıbülbül” muğam qrupu müşayiət edib.

Novruz Düşərgəsi

Elm və Təhsil İşçiləri Həmkarlar İttifaqı tərəfindən 21–25 mart tarixlərində təşkil olunan Novruz düşərgəsi elm və təhsil işçiləri üçün səmərəli mübadilə və inkişaf platformasına çevrilib.

800-dən çox həmkarlar ittifaqı üzvünün iştirak etdiyi düşərgədə Azərbaycan Dövlət Mədəniyyət və İncəsənət Universitetinin (ADMİU) professor-müəllim heyəti və əməkdaşları da fəal təmsil olunublar.

Düşərgə çərçivəsində universitetin Muğam sənəti kafedrasının müdiri, Xalq artisti, dosent Teyyub Aslanovun təqdimatında “Muğam aləminə səyahət” adlı konsert və maarifləndirici görüş iştirakçılar tərəfindən böyük maraqla qarşılanıb. Tədbir milli musiqi irsinin təbliği baxımından xüsusi əhəmiyyət kəsb edib.

Bununla yanaşı, ADMİU əməkdaşları Azər Həsənov, Hikmət Məmmədov, Samirə Əhmədova və Fatimə Qasımovadan ibarət komanda intellektual bilik yarışında I yerə layiq görülərək kubok və medallarla təltif olunub. Bu nəticə universitet əməkdaşlarının elmi-intellektual potensialının göstəricisi kimi yüksək qiymətləndirilib.

Eyni zamanda, ADMİU-nun Kulturologiya fakültəsinin dekanı, ADMİU Həmkarlar İttifaqının sədri Səyavuş Məhişov düşərgə müddətində universitetin həm tələbə, həm də müəllim üzvlərinin səmərəli fəaliyyətinə görə diplomla təltif edilib.

Düşərgə proqramı çərçivəsində ADMİU-nun Televiziya və kino tədris studiyasının müdiri Azər Həsənov tərəfindən keçirilən “Təhsildə süni intellekt: yeni perspektivlər” adlı təlim iştirakçılar arasında xüsusi maraq doğurduğundan proqram üzrə təlim iki gün davam edib. Təlim zamanı müəllimlərlə süni intellektin tədris prosesinə inteqrasiyası istiqamətində geniş müzakirələr aparılıb, sual-cavab sessiyaları təşkil olunub.

Qeyd edək ki, Novruz düşərgəsi elm və təhsil işçiləri arasında həmrəyliyin möhkəmləndirilməsi, peşəkar ünsiyyətin genişləndirilməsi və müasir təhsil yanaşmalarının paylaşılması baxımından mühüm platforma kimi yadda qalıb.

Beynəlxalq Müəllimlər Günü

ADMİU Həmkarlar İttifaqı Komitəsinin təşkilatçılığı ilə keçirilən tədbirdə universitet rəhbərliyi, professor-müəllim heyəti iştirak ediblər.

ADMİU-nun rektoru professor Ceyran Mahmudova tədbiri giriş sözü ilə açaraq bütün müəllimləri bayram münasibəti ilə təbrik edib. “Müəllim” adının ucalığından danışan rektor bildirib ki, universitet müəllimləri təkcə təhsil verən, elm öyrədən deyillər. Onlar həm də ölkəmiz və dünyamız üçün ixtisaslaşmış kadrlar, dolğun şəxsiyyətlər hazırlayan fədakar insanlardır.

ADMİU HİK-in sədri, dosent Səyavuş Məhişov çıxışında bütün müəllimləri bayram münasibəti ilə təbrik edib, onlara cansağlığı, uzun ömür və pedaqoji fəaliyyətlərində uğurlar arzu edib.

Daha sonra uzun illərdir ADMİU-da çalışan müəllimlər- professor, Xalq artisti Səkinə İsmayılova, Estrada sənəti kafedrasının müdiri, professor Məryəm Babayeva, professorlar İlqar Hüseynov, Məlahət Fərəcova, Nadir Hüseynov, dosentlər Əminə Qədimova, Yaqut Abdullayeva, Fazilə Abbasova, Nadir Bədəlov, Sevinc Şahhüseynova, Sərxan Abıyev, Fikrət Məlikov, Gülnar Verdiyeva, Altay Məmmədov, baş müəllimlər Leyla Qurbanlı, Tamilla Abdullayeva, Sevinc Dadaşova, müəllim Səmədağa Cəfərov bayram münasibəti ilə universitet rəhbərliyi və ADMİU Həmkarlar İttifaqı Komitəsi tərəfindən hədiyyələrlə təltif olunublar.

Təltif olunan müəllimlər göstərilən diqqət və qayğıya görə başda rektor Ceyran Mahmudova olmaqla, hər kəsə təşəkkür edib, bütün müəllimləri bayram münasibəti ilə təbrik ediblər.